政壇：泛民建制群起插「蘇」
免費電視發牌風波觸發萬人包圍立法會，香港電台向立法會申請逾六十億元撥款興建新大樓亦觸礁收場，商務及經濟發展局局長Greg蘇錦樑可以話係有將啲嘢搞到一鑊泡嘅天分。佢尋日去立法會工商事務委員會簡介施政報告措施，就被泛民主派同建制派議員圍插，就連佢嘅黨友蔣麗芸都忍唔住同Greg蘇講：「唔係同你有仇」，係拜託你做好啲工作。
設計圖片
死撐各部門合作無間
Greg蘇尋日出席工商事務委員會會議，被泛民同建制派議員圍攻。其中議員郭榮鏗就踢爆Greg蘇嘅政策局同律政司互相推波。佢話政府話要發展仲裁產業，但淨係成立諮詢委員會係唔夠嘅，仲要去外地推廣先至得。Greg蘇聽完就叻唔切，話政府各部門都有推廣，商經局亦有配合律政司嘅工作。點知Greg蘇呢頭講完，郭榮鏗就踢爆話，律政司方面嘅人士話係商經局唔肯投放資源，先搞到乜都做唔到。結果Greg蘇惟有死撐佢哋同政府各部門合作無間。
此外，議員單仲偕就喺會上講番政府對未來訪港旅客嘅預測。佢話政府預計一七年訪港旅客有七千萬人係太保守，又批評掌管旅遊嘅Greg蘇咁耐以嚟都冇具體方案疏導旅客。就連Greg蘇黨友「象哥」黃定光都對佢不留情面：「見到生意好，有乜理由落閘放狗？見個勢好梗係要諗下點發展啦！」質疑Greg蘇根本只係葉公好龍，推行政策完全係無料到。
而同樣係黨友嘅阿Ann就鬧爆Greg蘇唔理本港工業，乜都冇做過。氣上心頭嘅佢仲話︰「我入到立法會又係對住你，我唔係同你有仇呀！」望Greg蘇真係為業界做番啲嘢喎！
