港台榮膺浪費王 港府敗家招民怨
舊一年過去，新一年開始，又係樂壇派成績表嘅旺季，獲獎者笑逐顏開，落榜者斯人憔悴，已經成為每年一度嘅本地盛事。其實，唔止娛樂圈有頒獎禮，官場一樣有，唔同嘅係，被點名上榜嘅得獎者唔止笑唔出，仲臭名遠播，事關呢個獎項就係「十大浪費公帑」。
登登登櫈，十大浪費公帑之首嘅得獎者係……香港電台！港台秉承洗腳唔抹腳嘅敗家仔傳統作風，憑住令人咋舌嘅六十億元建將軍澳新廣播大樓撥款申請，最終眾望所歸，以高達九成九得票率榮登大花筒之最。緊隨其後嘅分別係觸發巨大爭議嘅終審法院申請綜援資格案，以及體現官僚揮金如土嘅西九文化區最新造價「超支」醜聞，至於被指茅台換政協而惹到一身蟻嘅前廉政專員湯顯明亦榜上有名，佢花費一千六百元購買牛腩魚蛋作「全署禮物」討好內地官員，以六成一得票進佔第八位。
值得一提嘅係，東方報業集團為民喉舌，旗下《東方日報》及《太陽報》踢爆消防處失職「入錯貨」，接連購入多種失靈設備，事件亦躋身浪費公帑「十大」之列；連同揭發貪湯豪花公帑外訪嘅矚目報道，兩報分別獲主辦單位頒發「毅力十足賞」及「窮追猛打賞」，成為大花筒部門嘅剋星。
正所謂，由儉入奢易，由奢入儉難。港台榮登十大浪費公帑榜首，簡直實至名歸喇。呢個大花筒部門醜聞不斷，揮霍公帑倒水咁倒，家陣仲變本加厲，一開口就話要攞幾十億元，打造勞斯萊斯級廣播大樓，佢哋就識歎囉，難為納稅人付鈔咋。
正如有團體話齋，六十億元唔係小數目，足以用作重建瑪麗醫院，大家話喇，呢筆錢應該投放醫療設施，定係畀港台豪使好吖？答案不言而喻喇，港產官僚一方面叫市民忍受恍如第三世界嘅醫療設施，一方面揮金如土畀港台享受六星級待遇，唔止浪費咁簡單，簡直就係揮霍無度，殘民自肥吖！
講到呢度，太一叮終於明白點解財政司司長曾俊華突然發開口夢，煞有介事警告財政儲備遲早有花光一日。梗係喇，官僚衙門鋪張浪費，多多錢都唔夠佢哋揈喇。講到扶貧紓困，官老爺總係同市民斤斤計較，牙痛咁聲，但一涉及到自己享受，郁吓就使幾十個億，眼都唔使眨一下，咁樣嘅官僚，咁樣嘅施政，點會唔民怨載道吖？
官僚年年大花筒，市民歲歲勒肚皮。講起上嚟，浪費公帑之最嘅大獎唔應該淨係頒畀港台，成個港府亦當之無愧吖，叮！
