城中鏡：李細燕獲封大埔之光

證券學會會長李細燕對大埔真係情有獨鍾，除咗佢間股票行喺大埔外，連首次榮升做馬主，愛駒都改名做「大埔福星」。「大埔福星」又真係為佢帶來好運，最近便拉頭馬，真係恭喜晒！

愛駒為李細燕帶來好運。

李細燕話「大埔福星」上一季仲係跑第尾，今季（舊年九月）開鑼，愈跑愈好，跑過第四、跑過第三，到上月二十一日更跑出第一。佢話贏獎金都係其次，最緊要有機會拉頭馬，佢話真係好開心，要請人食飯！

好多行內人都知大埔係李細燕「福地」，除咗股票行喺大埔外，佢連大埔區社會慈善活動都積極參與，好似拉頭馬當日，拉完就要匆匆趕返去大埔參加社區聖誕嘉年華活動，因此行內人都封佢為「大埔之光」。

佢除咗喺大埔起家外，原來佢由細到大都住大埔區，特別有感情，覺得大埔區風水好，又係安全城市，所以連愛駒嗰名都要改做「大埔福星」。