城中鏡：填《同舟之情》 陳詠謙搞喊把關人
政府之前為唔同嘅大騷都作過幾首主題歌，但劣評如潮，好似特區成立十周年嘅《香港始終有你》，仲畀網民攞嚟改埋歌詞，下場不堪入目，但舊年四月政府搞咗個「家是香港」運動，主題曲《同舟之情》似乎就幾令人受落。
陳詠謙話首歌唔需要渲染負能量。
最近人氣急升嘅填詞人陳詠謙尋日喺電台節目上，話當初收到邀請嘅第一個反應係有壓力，因為呢個時勢幫政府做嘢，容乜易畀人話係親政府嘅人。但係諗深一層，首歌係寫畀香港人嘅，所以最後都接受邀請。佢話政府唯一畀佢嘅指引就係自己發揮，唔使特登唱好香港，真實反映就得。
佢又爆內幕，話寫完第一稿之後，得到嘅回應係「寫得好好」，仲聽講「負責把關人」睇到喊添，之不過佢冇透露「把關人」身份喇。點解要喊？原來唔係太感動，而係歌詞太悲傷、消極。話說首歌第一句原本係「少不免會流淚，該怎麼走下去」，第三四句就係「一家親 親到醞釀矛盾 開始以敵人自居 同舟之情 由珍惜到粉碎」，將中港矛盾血淋淋寫出嚟，唔怪得有人睇到喊喇！於是呢幾句有啲被刪減，有啲略作潤飾。
咁有冇被「河蟹」嘅感覺？佢話冇，亦冇唔開心，佢認同一件事可以兩面睇，唔需要不斷渲染負能量，事關首歌係作畀大眾聽，係應該樂觀啲嘅。咁政府有冇再搵佢填詞？佢就話未收到風，如果獲邀都會盡公民責任幫手喎！
