城中鏡：黃進達項明生 追尋人類祖先足印
鑑於深度式旅遊近年勁受歡迎，康泰旅行社董事總經理Jason黃進達睇準形勢，七月尾將拍住旅遊作家James項明生直闖非洲埃塞俄比亞，追溯五萬年前人類祖先係點樣生活。Jason唔係第一次去非洲玩，但就從未去過埃塞，又話曾經去南非睇動物大遷徙，遇上成隻豹飛身跳上吉普車，驚險萬分，所以今次再訪非洲深入埃塞探險，好期待。
項明生苦等七日後，終於見到北極光。（受訪者提供）
黃進達、項明生
黃士心愈寫愈有癮，話咁快出咗第三本旅遊書。
苦等七天 終見北極光
啱啱由北極返港嘅James，尋日刻意着上好有特色嘅埃塞俄比亞土著衫現身，暢談當地風土人情。佢舊年初已遊歷當地，係超級地膽，難怪Jason都話放心一齊探險。吹咗十五日大風雪返嚟嘅James，面色好似雪人咁白，講到此行難忘經歷，係人生首次見到北極光。James話極光難求，由芬蘭追到去挪威，苦等六日都食白果，直至第七天早上佢去教堂祈禱完，夜晚果然見到七彩繽紛嘅北極光，開心到彈起。挪威雖然靚，但物價指數勁貴，佢話當地一個漢堡包賣一百三十八港元，咬落啖啖係血汗錢喎！
講起新春旅遊團嘅報名情況，Jason都話喜出望外，預計整體客量有一成半增長，當中長線超豪團特別搶手，十幾萬元團費嘅南極、南美團依然好受歡迎。受惠日圓平，日本團人數勁升五成，但泰國線就受示威影響，少咗兩、三成人。Jason嘅爸爸黃士心都有到場，仲趁機推出第三本講述日本嘅旅遊書。佢話本書寫足一年，愈寫愈有癮，嚟緊將出埋台灣及韓國旅遊書，同大家分享旅遊點滴。
