家陣，香港市民經常媽叉香港廢柴政府政治官員好反智，究竟，呢班庸才有幾反智？乜嘢係反智呢？嗱！就睇睇嗰兩件政制及內地事務局嘅超廢孖兄弟，局長譚志源同副局長劉江華之低B行為，便略知一二嘞！

星期日，上述兩件庸官落區走去建制派地盤做Show，派傳單宣傳政改點好點好，仲Call拫（音「行」）記者見證佢哋點落力勤懇樣。

擺明係做大龍鳳，又喺自己「勢力地頭」，點玩都得啦！路人甲乙丙嘅安排咁簡單嘅嘢，都假到甩甩漏。好嘅唔學，學美國總統愛攬小孩子拍照，人家係一種「親和力」的彰顯，而譚志源局長當着鏡頭前向幾個塞豆窿講解「香港政改」，唔好話細路仔一舊雲啦！依家，全港百姓有九成九都未知你「政改三姐弟」講乜叉啦！做Show做到咁低B，又怎教香港市民唔話你班高薪政治庸官係廢柴呢？

講起呢件政改新貴局長，江湖吹風話若果佢老細林鄭再上一層的話，佢就政務司都有份做咁話喎！哦！驚驚囉！

記得，早幾年前，譚志源仲跟緊前朝人肉錄音機林公公「做」時，上一個電台節目，講工作心得，佢話，當佢同老細（即林公公）遇到一啲難於解決嘅問題時，會同老細一齊入老細房嘅一個小密室內……搞乜呢？哦！佢話兩人會向上帝祈禱！原來，佢倆同是耶教弟兄喎！吓！咁都得！支咁多薪水，正職係幫香港市民祈禱？如果佢哋係信法輪功嘅，會點呢？副局長劉江華落區更搞笑，似選舉告急拉票多過做官，咁低工作能力，又廿萬一個月！

香港庸官當道，又一鐵證，記下之！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps