政壇：搞搞政︰開千呎超市搞辦年貨日教聯會同教協鬥搶客
由馮偉華做會長嘅教協，同教聯會係本港教育界兩大龍頭團體，其中前者多年來積累唔少選票，一直喺重要嘅選舉都力壓教聯會代表勝出，因此教聯會都一直諗辦法「升級轉型」。據聞，教聯會最新一招就係趁農曆新年前夕搞辦年貨日，明眼人都睇得出想增加會員歸屬感，客觀效果更加係同教協「鬥搶客」，究竟呢招對吸納會員有冇用呢？大家就要拭目以待喇！
設計圖片及對白
教協一向最受會員歡迎喺會址內超市，因為入面出售貨品一應俱全，而且價格合理，所以令不少會員頻頻幫襯，巧合地，教聯會早前亦喺會址劃咗一千呎地方，同有心人合作搞超市，售賣平價食品同文具等，希望為業界提供多啲貼身服務，吸多啲會員，逐步追貼教協。
臨近農曆年，教聯會就睇準機會再度出招，宣布會喺下周五起一連兩日，舉辦首次年貨展，到時一系列嘅賀年產品，包括賀年福袋、賀年糖果餅乾、急凍食品等等，全部以會員價向教師同工出售。
講開教聯會，九十年代出任教聯會會長嘅楊耀忠決定退落嚟，由鄧飛和黃均瑜分別出任主席同會長，未知新人事新作風，係咪能夠為教聯會帶來新氣象呢？
