政壇：袁國強含情脈脈冧爆卿姐
「政改三人組」之一嘅律政司司長袁國強，年近五十歲仍然單身，被喻為特區問責班子內最後一位「鑽石王老五」。尋日佢出席白鴿黨主席「卿姐」劉慧卿主持嘅網台節目，期間多次口花花話要含情脈脈望住卿姐，搞到同為單身貴族嘅卿姐冧爆，勁搞笑。
袁國強（左）同劉慧卿開咪前打情罵俏。
話說袁國強執到四四正正行入卿姐嘅網台錄影室，佢同卿姐寒暄幾句坐低後，問卿姐要望住邊個鏡頭先得。卿姐就以一貫老定語氣教佢唔使刻意望住鏡頭，除非佢想「含情脈脈」咁對住啲網民講嘢喇！點知袁國強聽到卿姐咁講，好搞笑咁望住卿姐講咗一句：「我鍾意對住你含情脈脈多啲。」同樣未婚嘅卿姐即時冧爆，仲笑到收唔到口，似乎對呢啲甜言蜜語相當受落。
政改諮詢正如火如荼，政改三人組嘅政務司司長林鄭月娥同埋政制及內地事務局局長譚志源下周五將同白鴿黨會面，獨欠袁國強，卿姐喺節目結束後單刀直入問當事人：「點解你唔嚟呀？係咪唔畀面先？」袁國強遇到牙尖嘴利嘅卿姐，只能不斷重複自己唔係唔想出席，而係有其他活動所以去唔到，講到幾乎滴汗。
