政壇：政府終讓步雙非嬰買樓要交BSD
立法會對其中一項樓市辣招、買家印花稅（BSD）草案嘅審議工作進入尾聲，政府決定讓步，吸納行政會議成員兼新民黨議員葉劉淑儀嘅建議，一刀切規定十八歲以下嘅香港永久性居民、不論佢哋嘅父母係咪內地人，買樓時都必須繳交BSD，以杜絕內地人或者公司買家，借雙非嬰兒名義買樓避稅。
立法會《二○一二年印花稅（修訂）條例草案》尋日再次開會，運輸及房屋局副秘書長（房屋）王天予話，葉劉嘅建議能夠更有效達致優先照顧港人置業需要的目的，加上議員認為未成年香港永久性居民嘅置業需求不高，政府決定吸納有關議員修訂作為政府修訂。由於政府修訂只須在席過半數議員贊成即能通過，毋須通過分組點票，睇嚟通過嘅機會大增。
對於其他由工商及地產界議員提出嘅修訂，包括豁免港人公司繳交BSD及訂立「日落條款」等，政府則堅拒讓步，引起相關議員不滿。地產及建造界議員石禮謙炮轟政府「唔止兩個口，係九個口呀！」又質疑葉劉嘅建議有歧視性，可能遭人司法覆核。手握六票嘅白鴿黨更表明不會支持主體法案。
