政壇：葉劉晒冷氹公記「閃婚」
政黨同政團嘅合與分，離唔開利益兩字。最近新民黨與公民力量（公記）傳出「閃婚」，引起政壇唔小震盪，初時有傳新民黨食檸檬，但主席葉劉淑儀仍然死心不息，尋日佢同該黨副主席田北辰殺入沙田，向十幾位公記成員簡介「合作計劃」。葉劉不斷端出「聘禮」，邀請公記成員加入新民黨，話新民黨有大量資源支持區議員，但強調唔會食咗公記呢個招牌，大家平起平坐喎！葉劉講到口水乾，最終公記召集人何厚祥會否講「我願意」，就要等待今周執委會決定。
設計圖片及對白
我哋收到風，尋日會面氣氛良好，葉劉好似變身推銷員咁，硬銷同新民黨合作有乜嘢好處。包括資源上嘅支持，新民黨嘅智庫資料亦任用，佢仲以美林同摩根士丹利兩間投資銀行作比喻，話兩間大型投行高層經常都調來調去，咁樣先有利雙方發展。
新界東精兵 身經百戰
不過，部分公記中人始終對呢壇婚事有保留，認為公記應該睇定啲先，但部分人則認為公記應該容許會員加入新民黨。支持合併嘅公民力量中人坦言，自從公記精神領袖劉江華加入政府後，公記群龍無首，變成一盤散沙，但由於公記成員個個都好打得又身經百戰，政圈上唔少政黨都諗住吸納呢隊新界東精兵，富貴黨、經民聯都嘗試過，但最後公記選擇同葉劉合作，絕對係計過度過。
該位人士仲分析，公記今次係想博一鋪，希望葉劉有朝一日君臨天下，可以眷顧公記中人。
葉劉擁有呢隊新界東精兵，不但分得新界東半壁江山，對特首選舉入閘又如虎添翼，一旦登上特首寶座，斷估唔會過橋抽板啩？
