違規船隻博大霧 海事官僚甩漏多
「政府靠得住，豬乸會上樹」，港產官僚渾渾噩噩，敷衍塞責，旨意佢哋為市民把關，保障公眾生命財產安全，真係靠唔住o架。呢，除夕煙火音樂匯演，維港百花綻放，兩岸歡聲雷動，表面上過程順利，人人盡興，實際上海面暗藏危機，差啲又樂極生悲o架。
件事係咁嘅。自從前年發生南丫海難，海事處揚言加強監管及執法，每當海上有大型煙火或煙花匯演，都會巡查船隻嘅安全及救生措施係咪足夠。佢哋話喎，今次觀賞除夕煙火匯演嘅船隻約有一百一十幾艘，絕大部分符合船上兒童須全程穿上救生衣、船長須備有乘客同船員名單嘅規定，但就揭發其中兩艘小輪分別涉及運作牌照和驗船證明書過期，以及船長未能出示有效證明，結果遭到檢控。即係話，經過南丫海難之後，一樣有船公司知法犯法，企圖蒙混過關，問你服未。
正如有立法會議員話齋，明知證件唔齊，居然膽粗粗博大霧，等於搵乘客生命較飛，船公司固然離譜，而海事處一向處事糊塗，事前未有發現，等到最後先至揭發，同樣難辭其咎。冇錯嘞，如果海事處監管到位，又點會有人博大霧呢，今次就話好彩冇出事啫，萬一悲劇重演，邊個孭得起呢隻鑊吖！
講開又講，海事處監管粗疏甩漏，導致海上安全漏洞多多，早就唔係新聞喇。本報早前踢爆，由於海事處監管寬鬆，法例不足，小型機動舢舨唔使領牌就可以出海垂釣，搞到成行成市，多次發生奪命意外。正所謂，「官不殺伯仁，伯仁因官而死」，海事官僚對海上安全隱患視而不見，聽之任之，絕對要負上最大責任。
俗語話，船到江心補漏遲。南丫海難揭發海事處官僚做事馬虎，敷衍塞責，由審批船隻圖則、監督建造，到檢驗程序，一條龍犯錯，埋下沉船禍根，令三十九名市民淪為怒海冤魂。經過嗰次慘劇，海事處話就話吸取教訓，加強執法，其實一樣係漏洞百出，危機四伏，可見港產官僚真係死性不改。
咪話太一叮唔提醒吖，好嘅唔靈醜嘅靈，香港時運不濟，港府當黑，特別容易招災惹禍，船公司千祈唔好搵人命較飛。而港產官僚更加要打醒十二分精神，做好監管角色，須知欺山莫欺水，等到出事再嚟補鑊咯喎，咁就後悔莫及o架喇，叮！
