SUN搞作：少膽虫手記：淫賤黎講環保
「阿虫，快啲過嚟！」淫賤黎突然轉死性，不單止晨早返到公司，更加刻意打扮一番，雖則着起龍袍唔似太子，但係一身西裝look，亦可見誠意。
「虫，有環保分子搵我傾吓點樣推動環保，呢次仲唔威番次？快的一齊開會吹大佢！」又唔怪得淫賤黎咁興奮，皆因平日佢神憎鬼厭，難得有人同佢傾環保大事，就好似湯漢斯流落孤島有個排球做朋友，你話幾難得呢？
「淫先生，我哋今次嚟係希望……」淫賤黎未等環保分子講完，已經急不及待發表環保大計：「我哋壹全霉非常注重環保，例如人哋唔要嘅新聞，我哋會循環再用又再用，喺公司方面，我哋亦積極實施廁所無紙化，所以班同事都好忍得嘅……」
淫賤黎真係死剩把口，講廢話滔滔不絕，好不容易才肯喘口氣，環保分子見機不可失，就以爭搭離開地球最後一班機嘅速度放話：「淫先生，其實我哋今次嚟係希望你積極考慮摺埋壹全霉，因為你間公司每日都印製大量廢紙，對堆填區構成極大壓力，為咗下一代，請摺埋。」環保分子完成使命，離開壹全霉大樓，整個下午，淫賤黎的抽泣聲未有停過。
