城中鏡：辨偽鈔妙法伍步功靠摸
沙田馬場尋日舉行元旦日賽事，好多城中名人趁假期入場鬆一鬆，竟然喺場內遇到永隆銀行後人兼順德聯誼會副主席伍步功。伍步功係永隆前董事長伍步高嘅細佬，平時較少出席公開活動，尋日係同順德鄉里南區區議員廖漢輝入場，為佢名下愛駒打氣。
伍步功（右）分享徒手驗鈔心得，南區區議員廖漢輝（左）都話好受用。
陳鑑光（右）希望今夏考到私人飛機牌，靚太陳鄭玉而（左）將係首個受邀登機貴賓。
姚君達透露其公司售股詳情即將揭盅。
雖然永隆銀行已出售畀招商銀行，但話晒伍氏家族幾代人做銀行，辨認銀紙真偽又點難得到佢吖。近期假鈔襲港，市民稍唔留神好容易中招，於是即刻請教佢幾招驗鈔術傍身。佢首先話近排出現嘅假鈔潮未驚過，跟住就教路，話驗鈔嘅竅門係靠手感觸摸，事關假鈔無論仿得幾咁真，一摸就知真假，亦可用眼細心睇吓水印，總之小心啲就唔會失財。
陳鑑光年內考機師牌
「熨斗大王」Charles陳鑑光名下愛駒亦有出賽，佢太太仁愛堂主席陳鄭玉而特登叫埋一班朋友去支持。Charles去加拿大多倫多學揸私人飛機已有年幾，幾時考到牌呢？Charles笑笑口話，依家只需再上五個鐘嘅單人飛行課程即可正式考牌，希望今年夏天攞到牌，然後就會買架私人飛機，到時就可以搭載香港航空青年團嘅小朋友飛上青天。咁陳太會唔會係第一個乘客？怕高嘅陳太諗咗幾秒鐘，表情好為難，十分搞笑。
轉頭見到考慮出售股份嘅米蘭站主席姚君達，佢話正同有興趣嘅買家商討，詳情暫未能披露住，過多兩個禮拜就有結果。
