早排爆出唔少高官同行政會議成員嘅利益衝突問題，令唔少行會成員聞風喪膽，咩都要申報一餐。據聞行會秘書處發現有乜唔妥，都已經好識做「溫馨提示」一眾成員要申報，甚至要求佢哋就可能涉及利益衝突嘅議題避席討論同投票。十幾名非官守議員中，立法會議員Starry李慧琼差唔多每次開會，唔係申報利益就要避席。如果啲成員下下都要避席，咁邀請佢哋入去做乜呢？

設計圖片及對白

按道理，Starry又唔係大商家，亦唔係坐擁大批房屋土地，點解佢要經常避席呢？原來佢一直幫緊四大會計師行之一嘅畢馬威做「資源培訓總監」。由於畢馬威係好多地產商、大企業嘅御用核數公司，大家都知道，政府每一個決定，十之八九都會涉及呢啲大企業，作為畢馬威員工嘅Starry，好多時候唔止申報利益咁簡單，直情連票都唔使投就走得。

申報利益制度已實行咗好耐，只係今屆政府雷厲風行，行會秘書處每次都作出「溫馨提示」，搞到部分成員例如李國章、史美倫，好多時都因避席而冇得投票。李國章係唔少公司嘅非執董，本身更持有港九新界多幢物業，每逢討論到涉及地產政策時都要申報。至於史美倫就多數申報家族利益，聽聞佢喺免費電視牌照一役，都要避席禁止投票。

第一手消息請下載on.cc東網iPhone/iPad/Android Apps