政壇：會董做蠟燭賀廠商會生日
維園工展會尋日舉行慶祝廠商會踏入八十周年啟動禮，特別喺會場放置一個高五米嘅巨型生日蛋糕，配合色彩繽紛嘅裝飾，寓意會務昌隆、步步高陞。不過，最得意嘅係，一班廠商會會董齊齊走入巨型蛋糕排排企主持切蛋糕儀式時，就好似一支支蠟燭咁插咗喺度，如果頭頂有燈飾扮火光就更加似蠟燭嘞！
廠商會會長施榮懷（右四）同眾會董化身「蠟燭」點綴巨型生日蛋糕。（受訪者提供）
廠商會走過八十年，多位成員分享咗生意經同挽留員工秘訣。廠商會副會長吳永嘉話香港勞動人口不足，加上失業率低，員工嘅議價能力高，所以經常出現跳槽潮。佢認為除咗薪酬之外，對公司歸屬感都係挽留員工嘅重要因素，好似佢去年就親自帶團，同員工去泰國玩咗四日三夜，當係慰勞員工。
常務會董方平就話，工作前景同工作環境對挽留人才非常重要，但佢認為喺出口行業任職嘅員工，今年唔應該對加薪抱太高期望。會董戴澤良亦話會喺同員工食飯時，親自了解員工嘅訴求，認為直接聆聽員工聲音較透過管理層了解更好。
