政壇：CY冀落實普選名入青史
二○一七年係咪能夠落實特首普選，或者係建制同泛民主派一念之間，但對於特首CY梁振英嚟講，呢個可能係佢歷史留名嘅黃金機會。CY尋日同二十三名「小特首」學生喺禮賓府聚會後，發表網誌時表明好想香港日後教科書同歷史書記載香港有史以嚟首次普選特首，係由佢本人做特首時落實嘅，當然呢個「史實」係咪可以成真，依家仲係言之尚早。
梁振英話希望將來歷史書記載佢任內落實特首普選。
此外，被外界視為挺梁嘅社交網站群組「港人講地」尋日爆料，原來CY同一眾「小特首」會面期間仲有「小插曲」。話說呢班「小特首」為趕住同CY會面，連午餐都食唔切，CY即時請人預備雞批同蛋撻等畀佢哋「醫肚」。
