政壇：建制派分裂黃友嘉辯解
中央政策組前首席顧問劉兆佳自從做咗全國港澳研究會副會長後，每隔幾日就會上電台月旦時事，最新言論就係話中央近年開始關注建制派分裂的影響，又話特區政府同建制派未能團結一致，兩者唔係一個政治命運共同體，關係好似「兩塊皮，唔係黐埋一齊」。
設計圖片及對白
佳叔突然放大建制派矛盾隨即引起外界無限揣測，出名公職多多嘅廠商會前會長黃友嘉尋日接受電台訪問亦罕有隔空回應，直言唔太認同佳叔指建制派分裂嘅講法，仲話建制派唔完全團結係事實，但就只係「某啲個別人士」嘅矛盾，唔可以代表成個派別喎！
撐CY施政方向無錯
不過，心水清嘅讀者其實心中有數，因為黃友嘉喺前年特首選舉期間，係首批開腔支持前政務司司長唐英年嘅政界中人，但隨住時間過去，佢都鮮有再提及或掛喺口邊。及至特首CY梁振英前年七月履新後，黃友嘉獲委任多項公職，做得有板有眼，可見獲得現屆政府重用，而佢喺訪問期間都有撐CY，自言對方嘅施政方向無錯。
另外，有「公職王」稱號嘅黃友嘉，公職數目長期滿瀉，所以去得電台做訪問自然乜都可以搭得到嘴，好似身為扶貧委員會社會參與專責小組主席嘅佢，尋日都有觸及青年問題，自言依家社會上好多工種都有發揮空間，例如電梯維修、工人等，只係依家啲後生仔「太揀擇」，變相「有工冇人做」。
但主持人反駁指一般藍領工種嘅人工都唔高，上年電梯維修業仲因為咁爆發幾次工潮，因此年輕人先睇唔到遠景喎。講到尾，呢啲其實都係觀點同角度問題，無話絕對啱同錯嘅。
