四味禽流齊拍門 最怕香港時運低

今時今日，香港時運低，疫症四面埋伏，一個唔小心，隨時中招。呢，淨係禽流感咋，就令人防不勝防。除咗內地嘅H7N9同H10N8，台灣亦錄得全球首宗人類感染H6N1病毒，而本港有位長居深圳嘅八十六歲老翁亦證實感染H9N2病毒，禽流感病毒四味齊發，連同中東爆發嘅新沙士，簡直係五鬼拍門，分分鐘長驅直入，問你怕未。

正如傳染病專家話齋，禽流感病毒品種愈來愈多，交叉變種嘅可能性亦愈來愈大，一旦出現人傳人，引爆大瘟疫，香港隨時雞毛鴨血。九七年禽流感殺雞百萬，○三年沙士奪命三百，依家諗起猶有餘悸。

最令人擔心嘅係，疫症當前，內地當局依然漫不經心。早前香港確診兩宗禽流感，兩名病人分別曾前往深圳同居住深圳，令人懷疑疫症可能喺當地感染，點知深圳當局矢口否認，直至當地有人中招，先至死死氣下令雞檔停業消毒。旨意國產官僚防疫喎，真係死得人多！

有個笑話係咁講嘅。內地禽流感搞到人心惶惶，有人向官員請教預防之道，官員回答：「盡量保持衞生，打開窗戶通風。」而被問到點樣防止霧霾，官員回答：「盡量留喺屋企，緊閉窗戶。」即係話，開窗又死，閂窗又死，避無可避，死路一條！

冇計嘞，國產官僚為人民幣服務，一個二個「坐以待幣」，點會關心百姓健康吖。傳染病專家就講得啱嘞，香港防疫始終都係要靠自己，尤其家陣禽流感喺兩岸三地四味齊發，反映病毒異常活躍，港府應該進一步加強把關，盡快引入H7血清抗體測試檢測內地活雞，設法將疫魔拒於門外。聽到未吖，疫症來勢洶洶，兵臨城下，港產官僚千祈唔好大意吖。

正所謂，好嘅唔靈醜嘅靈。二○一三年車公靈籤警示香港流年不利，防小人更要防瘟疫，結果一語成讖。二○一四年係農曆甲午年，玄學家稱之為「火焚年」，特別容易招災惹火，亦特別容易爆發瘟疫，加上香港時運低，港府自顧不暇，旨意佢哋防疫把關，不如自求多福好過。

一句到尾，健康無價，防疫重要，好心港產官僚醒醒定做好份工啦。香港已經烏煙瘴氣，七國咁亂，若果再爆發疫症，隨時天下大亂都似，叮！