城中鏡：駱家輝單手撐贏潘石屹

大家有冇聽過平板支撐（Plank）呢項訓練核心肌群嘅運動，每天堅持做可以同大肚腩講Bye Bye，令平坦嘅小腹重見天日。

據講目前Plank最長時間為一小時二十分零五秒，專家話若能堅持兩分鐘以上，都係英雄。

潘石屹喺微博中「晒」咗一張照片，顯示佢正同駱家輝一齊玩平板支撐，佢哋有一位共同嘅健身教練，所做嘅訓練都係一樣。照片中潘石屹做標準嘅平板支撐動作嘅同時，駱家輝就做「升級版」，只用一隻手。難怪潘石屹要以「超人嘅毅力」形容佢。

駱家輝點犀利法？潘石屹喺微博咁樣形容：「駱家輝今年六十四歲，我做一分鐘平板支撐時，他就能做五十一分鐘，他有超人的毅力。現在我能做到十分鐘，腹肌開始顯現。」佢仲話做Plank連奧運羽毛球冠軍林丹都唔係佢對手。

除咗運動之外，潘石屹都好樂意喺微博分享其他有助身體健康嘅心得，例如分享蔬果汁減肥法，聲稱一周可減六斤。

不過，呢個飲食方法就畀營養師狠批。到底潘石屹嘅健康療法有效與否，有待一眾網民驗證。但肯定嘅係，潘石屹微博嘅追隨者數字又增加不少。