城中鏡：施家齊腳食晏
每年除夕到新年，城中名人各有消遣。尋日午膳時間，子孫滿堂嘅福建幫頭領施子清夫婦現身銅鑼灣名人飯堂，施家四兄弟榮怡、Irons榮懷、榮恒同榮忻齊晒腳，加埋四位靚新抱同孫仔孫女合共十幾人，一張枱坐到爆晒，好熱鬧。期間佢哋巧遇喺度食飯嘅前博愛醫院副主席James吳俊華，眾人親熱寒暄問候，原來兩家人係相識逾半世紀嘅世交。
百仁基金前主席施榮忻（右一）同太太及一對子女祝讀者新年快樂。
施子清夫婦（前右及左）同吳俊華（後右）父母係世交，後左為施榮懷。
馮國經悠閒歎茶，仍不忘處理公務。
身兼中華廠商聯合會會長嘅施家老二Irons一見到James，即刻對James玫瑰園大宅喺聖誕節被爆竊表示關心。Irons話佢哋都係福建人，James讀小學時，係佢爸爸施子清嘅學生，而Irons就同James嘅細佬係小學同學，所以大家關係好密切。
講番尋日飯敍，原來係施家老大榮怡買咗條靚魚，特登拎畀嚟師傅炮製。Irons細仔亦喺美國返嚟度歲，難得一家咁齊人，所以咪聚埋食晏飲茶。至於夜晚全家亦會再聚埋食飯，齊齊倒數送舊迎新。
馮國經歎茶不忘公事
James講起屋企爆竊案仍好勞氣，話件事最激氣唔係損失逾一百六十萬元財物，而係每戶業主一個月交嘅管理費用高達一萬八千八百元，但仍發生爆竊案，眾業主正商量對策，確保唔會再被賊人光顧。
另外，飯後喺歷山大廈一間咖啡店遇見利豐集團榮譽主席馮國經好悠閒咁歎茶，冇耐就有一位朋友前去會合，期間馮國經仲好認真咁睇文件。除夕都咁勤力做嘢，難怪利豐歷經百年都仲咁硬淨喇！
