政壇：搞搞政：冇閒情打高球 傻強「割籍」
早前屢次發生官員同議員利益衝突或漏報風波之後，大家對利益申報嘅警覺性都提高咗。近月再有行政會議成員更新個人利益申報內容，其中財經事務及庫務局局長「傻強」陳家強就刪除內地一個高爾夫球會嘅會籍。因乜解究呢？
設計圖片及對白
傻強上兩個月更新嘅利益申報內容，刪去內地一個高爾夫球會會籍，一問之下，發現原來喺佢未做局長前已持有呢個會籍，以往不時會以波會友。不過，自從佢做咗局長之後，就再冇呢個閒情，亦好耐冇去過內地打波，所以與其每年都要申報一次，倒不如索性的起心肝整理好啲手續，咁都好嘅，費事唔記得又漏報啦！雖然傻強冇去打高球，但據聞佢不時都會去跑步健身。
另外，記者又發現行會非官守成員Bernard陳智思都有更新申報，同山西完全冇關嘅佢，最近竟然做咗香港山西商會榮譽會長。身為泰國華僑嘅Bernard話，呢個職務係受朋友邀請，希望香港、山西同東南亞以後有更緊密聯繫，所以掛個名囉！最近一個月，佢又做埋香港專業團體康體會名譽贊助人、香港校董學會榮譽會長，同埋傳承學院顧問委員局委員等，真係百足咁多爪。
