政壇：空氣健康指數甩轆誤報
環境保護署喺前日起採用全新「空氣質素健康指數」（AQHI），點知指數生效翌日即出錯。嘩！認真甩轆。
「空氣質素健康指數」夜後恢復正常。（互聯網圖片）
話說大埔一般監測站指數尋日中午十二時曾顯示為「10+」最高級別，對健康構成嚴重威脅，但係署方之後撤回讀數，承認儀器故障致誤報，仲為此向公眾致歉添！
新指數取代舊有嘅「空氣污染指數」（API），將空氣污染同健康風險掛鈎。環保署話尋日中午十二時許發現，部分監測站讀數有誤，大埔區指數曾誤報為「10+」同健康風險「嚴重」水平，而塔門監測站系統亦須調校。兩個監測站尋日一度停止顯示讀數，至傍晚先恢復正常運作。
此外，各區指數持續高企，截至尋日下晝六時，萬人聚集倒數迎新年嘅銅鑼灣嘅路邊監測站錄得「10+」最高級別，二氧化氮濃度達每立方米三百二十五點三微克，二氧化硫濃度為每立方米四十三點七微克，健康風險達「嚴重」水平，表示市民應盡量減少在戶外逗留及體力消耗。
而旺角同中環路邊監測站指數為「9」，健康風險達「甚高」水平；其餘十二個一般監測站指數為「7」至「10」，健康風險為「中」至「甚高」。
