警車避狗撞冧燈柱
【本報訊】「失魂狗」累警車自炒撞冧燈柱。現場沙田水泉坳街沙角邨對開燈位，昨晨十時許，隸屬新界南區衝鋒車，由五十餘歲老差骨駕駛，載着數名同袍在區內巡邏。期間，衝鋒車從沙角邨駛出，擬右轉駛入沙角街時，懷疑有流浪狗從路邊衝出，車長急忙扭軚，導致失控撞向路中交通燈，警車頭嚴重撞凹，機油漏出，交通燈被撞至「瞓地」，幸無險人傷。
衝鋒車撞冧交通燈，車頭嚴重毀爛。
有途經巴士乘客目擊意外經過，他表示，警車從路口駛出時，即失事剷向交通燈，車內數名警員隨即落車查看，幸當時無途人行經，否則後果堪虞。至於在路邊準備橫過馬路途人，目擊車禍發生，均嚇至目瞪口呆，有途人不滿警車橫衝直撞：「警車大晒咩，撞到連交通燈都冧埋，離晒譜！」
