未入正題之前,先同大家分享一則有關假鈔嘅笑話。

話說內地有個笨賊印製假鈔,結果唔小心將十元面值印成十五元,笨賊覺得棄之可惜,決定走去偏遠農村使用,向街邊叫賣嘅村姑買咗一隻雞蛋,結果畀咗一張十五元,居然找番兩張七元鈔票,笨賊大怒:「點會咁o架?」村姑反問:「一隻雞蛋一元,你畀十五元找番十四元有乜嘢唔妥呢?」咁啱有警察經過,立即將兩人逮捕法辦,並質問:「點解你哋要印假鈔?」二人異口同聲答道:「因為我哋唔識印真鈔咯!」

大千世界光怪陸離,無奇不有,笑話歸笑話,現實當中有冇咁嘅事呢?當然有喇。呢,唔只內地假鈔氾濫,香港同澳門都難以幸免o架!

適逢聖誕同新年消費旺季,假鈔黨又趁機出貨,搞到港澳兩地都被假金牛攻陷,香港方面由銀行揭發,而澳門就全部由賭場收到。呢批假金牛同屬中國銀行發行嘅二○○三年防偽特徵版,即背面印有會展圖案嘅千元鈔票,由於像真度極高,連銀行存款機同賭場都驗唔出,唔知仲有幾多喺市面上流通,搞到人心惶惶,聞牛色變。

講開又講,香港都唔係第一次發現假鈔嘅啦。二○○七年,香港曾經爆發假金牛風暴,後來風暴雖然平息,但警方依然年年檢獲大批偽鈔,由千元大鈔到二十元細紙都有。冇辦法啦,道高一尺,魔高一丈吖嘛,假鈔黨神出鬼沒,假鈔票推陳出新,尤其今時今日中港澳交流愈來愈頻繁,假鈔黨橫跨三地,大大增加執法難度,所以咯喎,港府除咗嚴密把關,仲要同內地、澳門通力合作,先至可以將犯罪集團連根拔起。

當然喇,求人始終不如求己,假鈔禁之不絕,像真度愈來愈高,港人只能自求多福。計太一叮話齋,如果唔係有必要,最好對千元大鈔避之則吉,真係要收金牛嘅話,仲有一個防偽嘅好辦法,只要大家攞起智能手機,上「東網」睇番相關新聞內容,裏面圖文並茂,詳盡介紹新版假鈔嘅辨識方法,眼光獨到嘅讀者自然冇咁容易被呃啦。正所謂,東網推陳出新,服務更加貼身,講得出就必然做得到!

總而言之,新年將至,騙徒出沒,為免招致損失,大家一方面要緊貼東網最新最準嘅新聞資訊,一方面自己都要小心為上。至於執法部門,唔該快快抽絲剝繭搗破罪案啦,香港已經夠亂嘅啦,再畀假鈔集團招搖過市,點只引起人心惶惶,隨時搞到金融混亂都有之!

第一手消息請下載on.cc東網iPhone/iPad/Android/Windows Phone Apps