今個聖誕，對好多人嚟講都係普天同慶，但對於壹全霉員工就係普天同！皆因淫賤黎order，個個同事都要送佢聖誕禮物，今日「扑猩day」仲要當面對質拆禮物，真陰毒！

「腦細腦細，唔好睇小呢隻USB手指，裏面有我廿幾年嚟珍藏嘅呵呵片，呢次真係有排歎！」呢個肥豪愈來愈精，識投淫賤黎所好，a夾硬死忍。「呵呵片一啲都唔實際，腦細，我呢支自浸嘅fing春神油，不但有名貴藥材喺裏面，最重要係有我成担心機，搽咗唔使頭耷耷，眼濕濕！」唔怪得早兩日見到膠蘇對住個廁格鬼鬼祟祟，原來求其斟啲廁所水就當神油。哈，夠賤！我就唔篤爆你！

淫賤黎接連拆咗九十幾份禮，收到嘅包括幫佢提早祝壽嘅壽衣，仲有紅鞋、綠帽一大堆，可謂大豐收，就喺呢個時候，佢貪婪嘅目光向我激射，同時拆開本虫嘅大禮，唔睇猶自可，一睇登時心曠神怡，拍手大讚：「知我者莫若虫！呢份禮物最實際！」拆禮物活動喺淫賤黎讚賞聲中結束，至於我送咗乜嘢禮物？呵，咪就係2014年「炒魷縮皮計劃書」囉！同事們，自求多福啦！

第一手消息請下載on.cc東網iPhone/iPad/Android Apps