社交名人Brandon周國豐見一對囝囝未見過真雪,日前精心安排一個三日兩夜聖誕節首爾滑雪之旅。一抵埗,睇見白雪皚皚,Brandon同太太黃泳霖未玩先興奮,但大仔禮淳同細仔禮熙就無晒心機,玩雪都吸引唔到佢哋,全因氣溫太凍,禮淳仲凍到發燒,攬住爸爸話想走,認真無奈。

周國豐夫婦見到真雪興奮拍照,大仔禮淳(中)就凍到震,無晒心機。(受訪者提供)

韓國滑雪場有唔同路線,適合唔同程度嘅滑雪愛好者。(受訪者提供)

周國豐慨嘆下次安排旅行地點要諗清楚先。

出門滑雪,Brandon為家人預備厚褸、冷帽及雪褲,裝備逼爆幾個篋,雖然裝備認真,但係小朋友嘅抗寒能力確實唔及大人。去到滑雪場,Brandon急不及待在雪地飛馳,大顯身手,更主動教四歲大仔初級滑雪,點知禮淳粒聲唔出,企埋阿媽身邊,原來刺骨寒風令佢渾身唔自在,而一歲半嘅細仔就倒頭大睡。

送禮物氹番兩愛兒

為免家人吹風,Brandon係咁意滑咗一陣就執嘢走人,返到酒店,先知大仔已經冷到發燒,幸好只係微燒,並無大礙,但整晚就要同太太輪流看住囝囝等退燒,認真疲累。Brandon事後話:「雪地真係太凍,小朋友太細個唔適合,下次安排旅行,真係要諗清楚!」

旅行未能盡興,返到香港,Brandon不忘補買禮物畀囝囝,大仔愛模型飛機同車仔,細仔就鍾意玩具樂器,咁佢自己呢?買書囉!日前行過中環置地廣場地下一間書店,見到佢搜羅一本解構西裝剪裁嘅書籍,可惜睇完一輪,都係無買。

第一手消息請下載on.cc東網iPhone/iPad/Android Apps