政府宣傳叫大家食得晒先好買，食得晒先好嗌，唔好做眼闊肚窄大嘥鬼！點知平時最識批評政府環保政策不足、要求當局教育市民垃圾源頭分類嘅一眾立法會議員，先至係真正嘅大嘥鬼。

設計圖片及對白

話說環保團體長春社嘅義工喺今年十一月就立會嘅垃圾做審查，將大樓六至十樓所有議員辦公室樓層嘅垃圾逐袋磅重，再逐袋「解剖」，發現除咗飯盒、膠盒、零食、番茄仔、麵包、麥皮同仲用得嘅文具外，就連綉花鞋都有，仲要係好新淨添!

咁多層辦公室嘅垃圾之中，發現由工聯會、人民力量、社民連同立法會會計部長駐嘅十樓最浪費。垃圾當中有餅乾、糖、話梅、肉鬆燒餅同盲公餅等十幾樣食物，當中只有一樣係過咗期，其餘嘅都仲食得，而佢哋可回收嘅物資亦係最重嘅。其次就係九樓，即白鴿黨同工黨嘅辦公室，而公文袋同新民黨所屬嘅八樓就排第三。至於經民聯同富貴黨所屬樓層垃圾量較少，但好可能係因為佢哋比較少喺辦公室喎。

幾位辦公室喺十樓嘅議員見到自己嗰層掉出嚟嘅垃圾後都耍手擰頭話唔係自己嘅。人力議員陳志全就話好少買零食，一定唔係佢；社民連梁國雄亦都話佢冇呢啲嘢。最離譜嘅係工聯會KK黃國健仲賴立會冇做好源頭分類，但其實立會每層樓都有三色回收箱，只係佢唔知啫。個個都唔認數，唔通要食誠實豆沙包先肯講真話？但同屬工聯會嘅郭偉強算係老實，見到啲垃圾就大嘆「陰功囉！」仲話有見過啲盲公餅添！

第一手消息請下載on.cc東網iPhone/iPad/Android Apps