身兼基本法委員會委員嘅譚惠珠早前接受電台訪問時,提及特首CY梁振英可能得罪地產商或大財團,之後又話如果CY被人撳住唔郁得,有能力都唔易發揮出來。有關言論出街後,新鴻基地產主席兼董事總經理郭炳江就反駁話呢個講法好唔公平。珠姐可能聞到陣味,尋日又喺同一電台澄清事件,話其實當日唔係講緊啲大財團撳住特首,而係講緊啲立法會議員。

譚惠珠

其實珠姐早前係話CY正好努力咁剷去啲老大難嘅問題,但喺搵地過程中,可能會得罪咗啲地產商或大財團,又話部分立法會議員或超級議員又可能認為自己認受性較特首高,以致特首施政舉步維艱,如果人哋撳住唔畀你郁,有能力都唔容易發揮出嚟。珠姐澄清話,當日節目主持都有問佢係咪講緊啲議員,當時佢免得對議員太尖刻,所以用默認嘅方式來表達,點知被誤會佢講緊啲大財團。

珠姐又話近日已經同郭炳江通過電話,大家已經冇問題喇,而且仲好開心咁互祝聖誕節快樂添!至於兩人傾咗啲咩?珠姐就話除咗《基本法》嘅事,其他都冇多講。而《基本法》第二十三條應該幾時再推出呢?珠姐就話等大家都成熟啲先啦,唔使急喎!

第一手消息請下載on.cc東網iPhone/iPad/Android Apps