政壇：平叔難忍港台混帳
香港電台早前要求喺將軍澳興建新大樓，點知建築費由不足十六億元「三級跳」至超過六十億元，立法會工務小組委員會上周開會就有二十名議員輪流炮轟，搞到隨時流產。曾經管過港台、前工商及科技局局長王永平（平叔）尋日就喺報章撰文，列出三大理由質疑港台「一句話就算解釋了八倍的增幅」，港台台長鄧忍光啲數又交代得唔清唔楚，要求政府擱置起新大樓。連平叔都出聲話要煞停「大花筒」，港台又係咪應該要知所進退呢？
設計圖片及對白
平叔話政府呈交畀立法會嘅文件，冇足夠理據同資料去解釋，點解六十億值得同必須付出。首先，港台預算「三級跳」，聲稱係因為要做數碼電台、數碼電視等新服務，但文件冇比較本港幾間有線或者無線電視台同樣設施規模，唔知根據乜嘢標準、要達致乜嘢要求，又諷刺「香港現時有眾多電台、電視台，他們的效率，一般不會比港台為差，甚至不少比港台高」。
要求撤回申請
佢舉例新聞中心面積由二百四十平方米增至一千九百一十平方米，質疑政府聲稱緩解員工辦公地方短缺，「一句話就算解釋了八倍的增幅？」話到明港台有責任解釋清楚措施同相關成本係咪合理。
港台身為一間公共廣播機構，佢質疑係咪需要提供五條電台頻道同三條電視頻道，又話港台唔係定位做政府喉舌，點解需要同二十四小時商營新聞台競爭。最後，港台唔考慮政治同商業因素，節目應該係貴精不貴多，更加唔應該同商營機構作無謂競爭。
平叔警告，立法會批准興建新大樓，其實等於同時批准未來港台經常開支倍增，佢估計呢筆數比依家七億多好多，認為咁樣做係有違議員代表市民監察政府善用公帑嘅職責，「說得嚴重些，是不負責任」，要求港台撤回申請，搞清楚定位先再作決定。
