港鐵蝦碌不斷 市民煩不勝煩
「乘客請留意」，港鐵呢句「溫馨提示」已經成為噩夢，每次一開咪，唔係列車跪低就係有阻滯，延誤幾分鐘已經係家常便飯，一個唔好彩隨時要等幾粒鐘o架。嗱嗱嗱，話口未完又嚟喇，呢次仲離譜，一日之內兩次事故，問你驚未！
港鐵高層尋日為日前將軍澳線架空電纜故障解畫，循例又係避重就輕，敷衍了事。最搞笑嘅係，一不離二，二不離三，呢頭鞠躬謝罪，嗰頭跟着又出事。九龍灣站尋日早上九點幾因為電力故障跳掣，列車服務延誤近五分鐘，多班列車受影響。唔知係咪撞邪，九龍灣站嘅故障啱啱搞掂，大約下午兩點又輪到九龍塘有事，據講有人誤闖路軌，搞到列車服務受阻近半粒鐘，月台人山人海逼到爆，乘客怨聲載道。
好事就話再接再厲、多多益善啫，事故一單接一單，仲要打孖嚟，港鐵仲有冇誇張啲吖？唔通想創造健力士世界紀錄？
表面上睇，尋日兩單事故相對比較輕微，冇對服務構成太大影響，問題係，事故先後發生喺早上同中午嘅繁忙時間，對乘客影響可想而知。再講吖，港鐵近年大大小小嘅蝦碌從未停過，幾乎無日無之，乘客唔激死都煩死喇！
嗱，講番將軍澳線架空電纜故障嗰筆。港鐵高層解釋話，事故係因為一個路軌轉線位置嘅架空電纜固定裝置損毀，導致電力供應故障引起，係首宗同類事故喎。喂，事故就係事故，一宗都嫌多，無論係首次定係第N次，都足以證明港鐵管理出咗問題，維修保養有甩漏。咁樣嘅服務質素，叫市民點樣收貨吖！
提起港鐵服務，真係不提猶自可，一提把鬼火，年年賺錢年年加價，最慘係加完價之後，服務質素唔見提高，反而每況愈下。就以將軍澳線斷纜為例，擾攘五粒鐘，港鐵應變失當倒瀉籮蟹，巴士接駁安排混亂，故障訊息發放慢三拍，大批市民喺冷雨淒風下狼狽不堪，直頭係靠害。
立法會通過冇約束力議案，促請港府研究對港鐵施加罰款，延伸至扣減港鐵董事袍金花紅。即係咁，有獎就有罰，天經地義，但如果罰得雞碎咁多，又係嘥氣嘅咋。咪話太一叮唔提醒，聖誕同新年假期就快到，唔該港鐵高層醒醒定定，如果喺普天同慶嘅節日搞出個大頭佛，咁就罪加一等，到時罰款都唔掂吖，叮！
