SUN搞作：少膽虫手記：冇狗用
「呢個掂啦！妸娜多姿！」「咦，但呢個屁股夠挺啵！」淫賤黎喺房度自言自語，少膽虫好奇地瞄了房內一眼，只見淫賤黎在把玩電腦，樣子猥瑣，不時嘴角上揚，令少膽虫不寒而慄。
少膽虫生怕淫賤黎在挑選新寵，決定上前賣口乖，走到淫賤黎身旁：「腦細，睇乜嘢睇到咁開心呀？」「揀寵咯！」淫賤黎的直接，中咗少膽虫的要害，頻呼：「腦細，我少膽虫為你宣淫販賤，亂作新聞，在所不辭……腦細……你……依家竟然玩厭咗……」淫賤黎大感錯愕，插嘴說：「虫，一齊揀寵物！我要買番幾隻狗！」少膽虫當堂個心定一定，努力擠出一臉笑容：「腦細，因乜解究咁有心情揀狗？」「你冇睇新聞o架咩？有色魔膽大包天摸黑偷襲少女，拖少女到山邊企圖強姦，適逢有位街坊拖狗散步，隻狗見有異樣撲前狂吠，色魔知衰即走為上着！」淫賤黎說得頭頭是道，可少膽虫聽得不明不白。
「腦細，咁關買狗乜事？」少膽虫語畢，「啪啪」，淫賤黎又獎少膽虫兩巴說：「我冇狗用呀！」可能淫賤黎針脷針得太多搞到黐脷筋，少膽虫以為淫賤黎講粗口，但聽淫賤黎續道：「啲狗咁勁，連色魔都嚇走埋，買番幾隻傍身，到時有乜仇家搵上門，都有啲狗頂住先嘛……」少膽虫心諗：「我哋《爛果》一向宣淫、造假為忠旨，積積埋埋嘅仇家多到數唔晒，買多一百隻門口狗返嚟都於事無補喇……」
