「犬決」原來係北韓一種處決嘅方法，係將犯人困喺一個大鐵籠裏面，然後放出一群飢餓嘅獵犬入籠，將犯人活活咬死，之後吃掉。據說獵狗通常會將犯人吃得乾乾淨淨，只餘一堆白骨。在場仲會有現場觀眾，觀看整個餓狗食人嘅過程。今次被金正恩處以「犬決」嘅就係佢嘅姑丈，即係佢親姑姐金敬姬嘅丈夫，有北韓攝政王之稱嘅張成澤。金正恩之父金正日，臨死時託孤於張成澤，希望佢好好匡扶少主金正恩，打理江山。

用極殘暴兼不人道嘅酷刑處決犯人，中外自古已有之，最早更加可以追溯至古埃及、古希臘及古羅馬帝國時期。虐待或折磨嘅英文Torture亦嚟自拉丁文嘅torquere，本身嘅意思係將身體扭曲，同時亦解作酷刑。由此可見，用不人道方法甚至夾硬粗暴對待人嘅肢體肉身，都係酷刑中常見嘅例子。一直去到中世紀，西方殖民者依然喺新大陸用最殘酷嘅方式對待印第安或其他原住民及異教徒。不過講到酷刑處決，始終都係中國人精於此道。中國人一向最叻對付自己人，尤其係異己同造反嗰啲，自先秦起計至今，真係不知凡幾。唔好計自古已有將活人烹煮，仲要分一杯羹嘅酷刑，淨係睇中國人發明得出凌遲處死，將活人一片片肉割落嚟，就知呢個民族自古以嚟嘅精神狀態係點。呢種對付異己同罪犯嘅方法，仲影響咗鄰近亞洲地區。不過最估唔到嘅係，到咗一街都係互聯網嘅二十一世紀，文明社會都相繼取消執行死刑嘅文明時代，北韓領袖金正恩，最近竟然下令執行咗一次「犬決」！仲要係用嚟對付異己，真係恐怖又悲哀。

就係因為北韓呢次處決，「犬決」就成為潮語。網民開始用呢個字開玩笑，但凡有啲人犯眾憎，佢哋都會網上留言話要「犬決」。香港要「犬決」人都睇怕唔少，如果將回歸十五年嚟嘅賣港賊集體「犬決」，觀眾可能真係多到要大球場先夠坐！

第一手消息請下載on.cc東網iPhone/iPad/Android/Windows Phone Apps