政壇：搞搞政：鄧國斌入廉署委會掃走貪湯遺毒
東方報業集團去年二月獨家連日揭發「貪曾」前特首曾蔭權爵士嘅貪盡海陸空醜聞，廉政公署立案調查至今已有二十二個月，但律政司仍未有進一步行動，而廉署亦未對調查作任何公布。港府尋日突然宣布「空降」前審計署署長鄧國斌做審查貪污舉報諮詢委員會嘅新任委員。眾所周知，呢個委員會有份就歷時超過一年或需要大量資源調查個案嘅進展作審查，唔通預示貪曾「落鑊」之期不遠？另一方面，以鄧國斌嘅審計專長，呢個時候入廉署實有助掃走前任專員貪湯湯顯明嘅遺害。
設計圖片及對白
政府按慣例喺年底陸續公布委員會最新委任名單，四個廉署諮詢委員會大部分現任委員都獲續任，而鄧國斌加入審查貪污舉報諮詢委員會似乎有深層意義，因為該職位有機會(目及)實廉署拖近兩年都冇公開交代嘅貪曾案，記得鄧國斌曾負責審計貪曾豪花公帑外訪嘅醜聞，並對外發表詳盡報告，相信佢最有權威去跟進此事，免得貪曾心存僥倖以為可以側側膊唔多覺。
此外，鄧國斌殺入廉署委員會嘅另一目標，可能同被視為貪曾愛將嘅「貪湯」前廉政專員湯顯明有關，因為貪湯濫用公帑送禮同宴請內地官員，將廉署肅貪倡廉嘅形象一手摧毀，出名鐵腕辦事嘅鄧國斌倘時間許可，或可能會過兩招清除埋貪湯喺廉署嘅遺毒遺害，幫廉署省番靚個招牌。
