政壇：胡慧中新形象撐愛心獎
港澳台灣慈善基金會主辦嘅第八屆愛心獎日前喺洲際酒店舉行頒獎禮暨基金會董事會就職禮，包括慈善家田家炳在內嘅五位港、台善心人士成為今屆得主。當晚嘉賓眾多，其中一位就係前民政事務局局長何志平太太胡慧中，經過極速收身嘅佢成個靚晒，好多影迷都爭相同佢合照。
胡慧中（左）收身後以全新靚太形象，去支持姊妹何玉美（右）擔任基金會新主席。
胡慧中當晚專程去支持基金會新主席何玉美（Emma），佢讚Emma多年來出錢出力，仲話行善唔應該只係做捐款機器，而係要付出真心。同場仲有擔任愛心獎終審委員會主席嘅基本法委員會副主任梁愛詩、專程來港嘅台港經濟文化合作策進會董事長劉德勳等人。
今屆香港得主仲有辭去百萬年薪、免費為貧困青少年補習嘅前中學校長陳葒，台灣得主就包括亞都麗緻飯店董事長嚴長壽、關懷長者嘅天使林依瑩及輪椅鬥士鄭淑勻。卸任嘅基金會前主席錢立祐喺台上介紹得獎者時，頻頻熱淚盈眶；而基金會創會主席林添茂見個會漸受肯定，感到好欣慰，誓言後年進軍內地，齊齊表揚中港台善心人士。
