由徙置公屋石硤尾美荷樓活化而成嘅YHA美荷樓青年旅舍尋日開幕，負責嘅香港青年旅舍協會更宣布喺今日至下月底舉行十一元入住旅舍大抽獎，搞到有份出席嘅活化歷史建築諮詢委員會主席、行政會議成員陳智思（Bernard）都心思思想帶埋太太同兩個小朋友齊齊住番晚。有份搞美荷樓項目嘅Bernard更賣花讚花香，話如果呢個項目十分為滿分，佢會畀滿分咁話。

梁振英參觀美荷樓後，晚上透過網誌表達政府興建公屋嘅決心。

香港青年旅舍協會行政委員會主席黃奕鑑送咗本《美荷樓記》畀陳智思（右）。

Bernard喺開幕禮後參觀旅舍房間同設施，佢好滿意呢個項目，話旅舍內部間隔雖然有少少改動，但仍然可以展示香港過去一代移民嘅歷史。而佢最滿意就係美荷樓生活館，覺得每個房間都可以呈現出當時美荷樓居民嘅居住環境，加埋原居民嘅導賞團口述當時生活情況，對年輕人同遊客了解呢段歷史好有幫助。

出席主禮嘅特首梁振英參觀美荷樓後有感而發，尋晚喺網誌上撰文，話咁多年來政府都係透過拆遷、安置，逐步將原本住喺山邊寮屋、天台木屋等基層市民遷入公屋，有關處理房屋、收地同拆遷問題嘅艱難程度都冇變過，只怕依家解決問題嘅決心變咗、聲音多咗、行動少咗。佢話如果當年港人議而不決，決而不行，畏首畏尾，依家就唔會有一半港人住喺公屋，所以如果政府唔做嘢，公屋供不應求，受損嘅只係香港人喎！

第一手消息請下載on.cc東網iPhone/iPad/Android Apps