單日堅（左二）同十幾名正生書院學生齊唱聖誕歌。
仲有幾日就係聖誕節，兒童發展配對基金尋日喺銅鑼灣一個商場搞咗個「聖誕頌歌節」籌款活動，佢哋邀請到懲教署署長單日堅主禮，佢仲同十多名正生書院學生齊唱聖誕歌籌款，睇單日堅嘅表現，似乎冇難度喎！
單署長話，佢除咗唔識唱粵曲外，其他歌都唱得吓㗎，加上佢小學同中學都係讀教會學校，基本上任何聖誕歌都難佢唔到咁話。不過，熟知傳統聖誕歌嘅佢就未必聽過尋日大會播放嘅第一首歌，事關呢隻係由一班正生書院學生創作嘅聖誕歌。現場所見，單日堅又真係冇甩嘴喎，唔通大會提早通知咗佢？今次唱歌賀聖誕，又可以做善事，一班參與者都好開心。
第一手消息請下載on.cc東網
