政壇：審議辣招就掂傻強爽晒
港府年前推出雙倍印花稅等樓市辣招，但草案一直喺立法會審議，日前美國正式啟動退市，港府財金官員嘅第一個反應就係擔心樓市又唔穩定，財經事務及庫務局局長陳家強（傻強）更明言，美國息口唔會一直唔升，所以香港應該盡快通過管理樓市措施嘅辣招。佢呢頭講完，立法會尋日就傳來好消息，因為身兼行政會議成員嘅草案審議委員會主席李慧琼嚴禁議員繼續拉布，依家草案審議只剩低一位議員嘅修訂，及少量議程需處理，辣招有望下月六號開最後一次會就完成審議，最快下月底或最遲二月初就可以提交大會表決，傻強呢次真係安樂晒！
設計圖片及對白
僅剩葉劉修訂要傾
《二○一二年印花稅（修訂）條例草案》委員會尋日再次開會，辣招草案喺多名地產及工商界議員「拉布」下，審議過程真係拖得就拖，其中代表地產及建造界嘅議員石禮謙更加出盡板斧。尋日開會時，主席李慧琼明顯收緊發言限制，更多次要求石唔好再重複發言內容，委員會最後完成審議由石禮謙等多名議員提出嘅修訂，包括豁免港人公司繳交買家印花稅、在買入物業三年內如沒有轉售可獲退稅、以及為辣招訂立日落條款，即到某個日期就自動失效等。
委員會過咗石禮謙呢條修訂後，猶如掃除咗一個障礙，事關剩低嘅修訂係由同樣身兼行會成員嘅新民黨葉劉淑儀提出，規定十八歲以下香港永久居民置業亦須繳交買家印花稅，以杜絕內地人借助雙非兒童來港買樓，呢個修訂須留待下次會議討論，但呢個修訂嘅爭議冇石嘅修訂咁大，拉布又已成過去式，預料草案喺踏入新一年之始就有望傾妥。
