絕代雙貪毀廉政 鐵帚除奸豈能拖

唔使太一叮多介紹，絕代雙貪就係前特首曾蔭權爵士同前廉政專員湯顯明，呢對官場老鼠狼狽為奸，結果累到香港嘅國際形象不斷插水。係咁嘅，國際反貪組織「透明國際」公布新一年度清廉指數，香港全球排名比上年再度下跌一級至第十五位，係自○六年以來、即最近七年嘅新低。評分方面，香港亦下跌兩分至七十五分，被主要競爭對手新加坡大幅拋離十一分。

都話喇，絕代雙貪臭名遠播，首先斷送嘅就係本港廉潔形象。正如有學者直斥，貪曾貪湯敗壞廉潔聲譽，引起國際關注，與排名下跌有直接關係。廉署發言人亦坦言，貪湯酬酢風波及近日數宗涉及新舊高官嘅案件，相信或影響受訪者對香港嘅印象。嗱，畫公仔唔使畫出腸，但係鬧貪官就要鬧出面，廉署唔方便講到咁白，等太一叮幫吓你哋啦，貪曾貪湯，你哋簡直係佗衰家呀，叮！

講起呢對絕代雙貪，街知巷聞，曲折奇情，真係夠料寫部新版官場現形記o架。第一章回，貪曾禍港七年，「曾商勾結」，貪遍省港澳，歎盡海陸空，結果觸發巨大民憤，淪為第一個遭廉署立案調查嘅港府阿一，落台滾蛋後成為過街老鼠。第二章回，契弟貪湯橫行廉署五年，豪送禮、豪飲酒、豪遊埠，結果觸發政治風暴，淪為第一個被立法會「痛斥」嘅廉署阿一。最奇情嘅係，貪湯被譴責之後，佢唔係引咎自責，公開謝罪，居然仲發聲明問佢違咗乜嘢規喎，大家話喇，有個咁厚顏無恥嘅廉政專員，廉潔指數唔直線插水至奇喇。

公道啲講，香港清譽不保，亦唔能夠完全怪晒貪曾貪湯嘅，其他「曾兄弟」一樣功不可沒o架。好似人心不足蛇吞象嘅前政務司司長唐英年，因為豪宅僭建「地下王宮」而令身為業權人嘅老婆被罰款十一萬元，成為近十年同類案件中嘅最重判罰。又好似另一位前政務司司長許仕仁，被指控涉貪不特止，仲因欠債纍纍而被頒令破產。貪曾一門四腐，蛇鼠一窩，比小說《絕代雙驕》裏面嘅十大惡人更加惡名昭著呀！

講番最重要嘅問題，廉潔排名點至可以止跌回升呢？太一叮始終都係呢句：「反貪腐，捉雙貪！」如果廉署調查貪曾貪湯繼續放軟手腳，唔嗲唔吊，香港廉潔排名肯定仲有排跌吖，叮！