香港廢柴政府以公帑十八萬元高薪聘用那件「欠豐富」傳媒工作經驗的庸才馮煒光任「新聞統籌專員」，不特只全個香港新聞界上中下行家嘩言媽聲四起，連政圈左中右各路人馬（包括親政府的保皇建制派），亦對此粉皮之辦事能力不敢恭維。這種人未埋位做嘢，就被肯定唔得掂之指摘，確實少見！

咁又係，有關馮煒光的新聞，沒有一件好嘅！唔係「賣黨求榮」、同人爭執，就係支持洗腦教育的反智國教，甚至負責藝發局選舉之小事，都要搞到當眾俯首彎腰，鞠躬認衰，如斯質素，怎教人信服佢值十八萬元一個月呀？老老實實，我家洗廁所都唔用佢。

香港廢柴政府高層「一籃子因素」下，力排眾議，不顧民意，係要請件咁嘅貨色返嚟，一定有其隱密盤算的！坊間猜測，無人才肯加入庸廢班子，所以垃圾當寶用；亦有高人分析，話此人夠忠心面懵，願做爛頭卒，心口掛個勇字，可助老細橫衝直撞，推行「惡法」云云……

乜都好啦！香港苦難多多，多一件小丑撞牆翻觔斗，畀各位鄉親父老插吓屁股，逗吓街坊鄰里笑足半日，也不失好事嘅！反正，弱能弱勢政府的民望低處未算低的窘境下，竟有人甘於做墊屍底，真係邊度搵呀？而且，肯定會出事的活生生箭靶，有轉移視線的功效，讓全人類集中喊打一隻過街老鼠！

馮煒光雖然天生巖巉，但志氣高超，佢揚言話自可媲美「白宮發言人」喎！哈哈！三隻字：「睇佢點死！」

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps