SUN搞作：少膽虫手記：真新奇趣切
淫賤黎下晝一返到堆填區就召開緊急會議，所有編採人員都要出席，見佢懶係認真嘅表情，就知又要聽佢講廢話，打算瞌一瞌之際，我呢條可憐虫又畀佢盯上：「虫，你做到腦腫咁大個位，咩係新聞你知唔知？」少膽虫我雖然靠擦鞋上位，但係都讀過兩年書，即時回話：「符合真、新、奇、趣、切，就係吸引嘅新聞！」淫賤黎少有咁露出滿意笑容，大讚：「阿虫，講得好！」，我即刻加多兩錢肉緊：「既真且新、奇特有趣，同讀者有切身關係嘅就係好新聞！」
「啪！」淫賤黎嗰頭讚完，呢頭又無端端醒我一巴，唔通呢次係楊修之死？但見淫賤黎怒氣未息，肥豪即時抽水：「腦細，到底真、新、奇、趣、切係點解？」「真者，真作假時假亦真，新聞唔使理真假，有咁大作咁大，銷量自然好！」淫賤黎謬論一出，肥豪、膠蘇之流即時叫好，狗到無倫，但係淫賤黎就勁受呢套，續道：「新者，新不如舊，舊不如偷。舊聞唔怕翻炒，最好就去偷人哋啲舊聞，慳水慳力！」「奇者，奇文共賞，好似醜陋呢啲標題要多啲用！」「趣者，揭人私隱，傷口灑鹽，白事當紅事，實有賣座力！」「切，唔係切身，係要切咗你哋嘅良心，咁先可以將《爛果》推向新境界！」淫賤黎嘅新聞哲學，點到我唔服？
