政壇：林亮執靚黃鴨亮相工展
早前都講過當年靠生產經典黃鴨玩具起家、行政會議成員林健鋒父親林亮（林伯），近年決定讓已停產五十年嘅黃鴨「翻生」。早前佢搵咗玩具設計師幫佢個「乖仔」黃鴨改頭換面，鴨眼改成水汪汪，鴨嘴角更彎更翹，頭上更加番三條頭髮，寓意有一顆赤子之心，下周六就會擔任工展會嘅吉祥物，勢再掀起熱潮。
林亮（右）同孫仔林凱章（左）手上嘅傳統黃鴨同新設計嘅「Lamon Tea」黃鴨，將會成為工展會吉祥物。
林亮會將五隻有明星簽名嘅黃鴨放喺工展會拍賣，每隻底價八千元。
新設計嘅黃鴨將命名為「Lamon Tea」係林伯個英文名同檸檬茶英文嘅混合體，會連同黃鴨錢箱、杯蓋等十萬件產品，喺工展會作慈善義賣，扣成本後會作為廠商會兩間中學嘅獎學金。林伯嘅太太，早前出席「玩具大王」蔡志明娶新抱飲宴時，拎咗五隻黃鴨畀海洋公園主席盛智文同演藝界人士簽名，而早前去北京時更請埋內地女星斯琴高娃簽名，認真夠面子。林伯話五隻黃鴨會喺工展會拍賣，每隻底價八千元。
今年工展會將喺本月十四日至明年一月六日喺維園舉行，入場費十元，場內有逾四百家參展商，逾二十種產品以一元優惠價限量發售。雖然廠商會唔肯估計入場人次，但就話總銷售額會比去年七億港元多五至十個百分點。
