韋恩
投資名宿韋恩自八六年起，每年年頭都會發表「本年十大驚奇」，過去兩年命中率就高達百分之五十，你都咪話唔把炮。但一個人無論幾聰明，總有失手嘅時候。佢今年公布嘅十大驚奇，起碼到今日為止，有八成都係錯嘅。
諷刺嘅係，落空嘅預言好多都同投資有關。例如佢話大陸滬綜指今年會升兩成，但至今跌近百分之七，期間真係試過跌兩成嘅，就係今年六月大陸「錢荒」嗰陣囉。韋恩又講過，歐股會因歐洲經濟冇改善而跌一成，但至今啱啱相反，累升超過一成。
佢喺年初預言伊朗今年會整到核彈，點知伊朗新總統魯哈尼偏偏為咗o氹西方解除制裁，主動放棄部分核設施，認真邪門。
可以令佢老人家比較安慰嘅，就只有日經平均指數受惠圓匯下挫而爆升；同埋共和黨為咗一六年總統選舉，為西班牙語非法入境者爭取公民權咋。
第一手消息請下載on.cc東網
