政壇：民主阿婆亂抽政改水
每逢香港政壇有重大事情發生，「搞事四人幫」之一嘅「民主阿婆」前政務司司長陳方安生例必蒲頭抽水，政府尋日展開政改諮詢，民主阿婆又第一時間撲出嚟啦！話說佢尋日以名譽贊助人身份出席「香港啟迪會」成立十周年慈善晚宴嘅簡介會，但都不甘寂寞要做時事評論員，一時話政府諮詢得五個月唔足夠，一時又話首份諮詢文件冇實際建議，要之後嘅諮詢先有用，究竟佢係咪前後矛盾呢？
設計圖片
民主阿婆早已冇晒政治能量，早前佢就成立組織「香港2020」，諗住推動政改。點知政府尋日一宣布展開政改諮詢，佢就咁啱得咁蹺有活動要出席，仲好順便咁噏番幾句。佢話五個月政改諮詢唔足夠，因為二○一六年立法會選舉法例修訂，最遲要一年前，即係二○一五年七月就要完成，畀有意參選嘅人知道規則喎，但依家就嚟到一四年，五部曲都仲未啟動。
社交網留言濫竽充數
不過，佢話首份諮詢文件冇實際建議，之後嗰份先有，咁點解諮詢五個月仲未夠呢？佢又話，第二份建議要畀市民討論協商，好似功能界別存廢呢啲複雜議題，各界有好多分歧，要畀足夠時間大家討論同協商。協商完又要呈交中央畀指示，之後到立法，恐怕政府特登拖到咁晏諮詢，最後就話「你接唔接受吖，唔接受就原地踏步」。可能民主阿婆做官嗰陣慣咗慢手慢腳，唔怪得推行政策拖咁耐，你唔畀新政府效率會快啲咩！
民主阿婆除咗出嚟噏嘢，香港2020做咗鍵盤戰士，（目及）實社交網站，當政府個政改諮詢專頁出台，就重複兩次留言佢哋嘅立場書，其實發言唔係計量，而係計質素，濫竽充數係無用嘅，明唔明？
