有人拐腳尋子有人定過抬油
【本報訊】三名無媽童集體失蹤，有爸爸為尋找愛兒，即使腳傷仍親身「落區」找尋；亦有「非常父親」，雖未知兒子身處何方，但依然「定過抬油」，因他相信離家出走的兒子終會鳥倦知還，結果一語中的，愛兒重回身邊。
嫲嫲買生日蛋糕盼孫歸
任職髮型師的黃先生，早前意外弄傷腳，現時走路仍一拐一拐，縱使舉步維艱，但他為尋回愛子，仍負傷走遍上水、大埔和粉嶺，又四出向街坊及兒子的朋友打探，只望兒子早日回家團聚。「暉仔未試過離家出走，佢身上應該冇錢，呢幾日又凍，我好擔心佢，但要搵嘅地方都搵過，要問嘅人都問過，可以做嘅都做晒，依家惟有希望個仔自動自覺，乖乖哋快啲返屋企。」
另一失蹤男童張家偉，其父母三年前離異，張父因長期在內地工作，家偉遂交由祖父母照顧。如今家偉音信全無，縱使張父公務繁重分身不暇，惟聞訊後仍即時着祖母趕快報警。張祖母稱：「家偉十六號生日，我哋應承買蛋糕同佢慶祝，依家個孫都唔知去咗邊？我哋好驚佢畀黑社會分子氹去做壞事，又驚佢畀拐子黨捉返內地，劏開攞器官去賣，命都冇埋，真係好擔心。」
暉仔和家偉的家人焦慮難安，任職飲食業的吳先生則對有出走前科的兒子柏誠回家信心十足，「細路仔讀書有壓力，行出去一、兩日有乜問題？只係今次行耐咗啫！佢又唔係唔識路返屋企，有手有腳，要返就返o架啦！」結果吳父一語中的，柏誠在「無飯開」下，主動現身向爺爺求救，最後回家。
