讀萬卷書不如行萬里路，行萬里路必須花萬両金，遊學之風由大中小學蔓延到幼稚園，不僅富家子弟遊學，基層父母也要節衣縮食讓子女出國增廣見聞。話說有標榜平民名校的幼稚園推出三萬多元美國豪華遊學團，搞到貴族幼稚園校長苦惱不已。忽地靈機一觸，想出一條絕橋，急召家長共商大計。

校長：各位親愛的家長，攀比之風可惡啊！現在連平民幼稚園都要去美國遊學了，本校為了保持超然地位，決定大佢一鋪，推出月球遊學團，帶孩子們衝出地球、奔向宇宙！

家長：人家帶孩子去美國見西人、學英語，而那月球上鳥都冇隻，去學甚麼呢？

校長：月球雖然無人，但去月球意義重大，可以學到力學、數學等等。當年美國首名太空人登陸月球，留下「個人一小步，人類一大步」的名言，將來我們的學生也可驕傲地說，月球一小步，人生一大步！諗咁多做咩呀，你哋又唔係冇錢！

家長：唓，小小年紀，腦囟都未生埋，學得幾多啫？有錢都唔係攞嚟嘥呀！

校長：本遊學團屬自願性質，閣下唔想去就悉隨尊便，不過咁，朱咪咪都有講啦，小朋友成日被嘲笑，係會產生自卑感嘅！係呢，你咁多意見，不如接個仔返屋企自己教啊？到時連美國都唔使去，得閒帶佢去旺角得啦。係咁！