中產悲觀前景淡 香港明天點會好

有團體調查發現，中產家庭唔止係夾心階層，更加係「憂心階層」，對下一代前景普遍悲觀，情況之嚴重前所未見。調查發現，中產家庭極不看好年輕一代嘅發展前景，而且家庭收入愈高，悲觀情緒愈濃烈，以月入五萬元或以上嘅組別為例吖，居然超過七成人認為青年人嘅未來會比自己這一代差。開講有話，青年係國家棟樑，中產係社會支柱，如果中產一代不如一代，香港仲有乜前途可言呢？

無巧不成話，早前有調查反映青年人對香港前景悲觀，依家調查又反映中產對下一代前途悲觀，事實好明顯，香港嘅未來一片灰色。點解香港出路愈走愈窄，青年人同中產家長憂心忡忡，唔使問阿貴，梗係港府施政無能啦。所以咯喎，調查機構促請當局檢討政策，為年輕人拓展機遇，而有中小企老闆更加大嘆：「政府扼殺創造力，我一諗到子女未來就頭痛！」

一言驚醒夢中人，發緊夢嘅港產官僚醒未吖？講真，中產擔心下一代出路，主要唔係對子女冇信心，而係對香港冇信心。正所謂，此一時，彼一時。香港遍地黃金嘅年代已經過去，經濟起飛嘅高速發展階段已然不再，以前大學畢業即刻大把人爭住請，今日大學畢業咯喎，想搵份穩定又有前途嘅工作仲難過中六合彩，試問仲點有前景，點有希望吖？呢個既係社會發展嘅規律，亦係香港面臨嘅危機，幾乎人人都知，唯獨係港產官僚扮唔知啫。「中產」高官有閒情逸致歎咖啡、睇法國電影，居然冇魄力為經濟謀出路，簡直豈有此理！

更離譜嘅係，港產官僚唔止冇為經濟謀出路，反而令經濟行歪路。前朝曾蔭權政府當財團係親生仔咁錫，政策長期傾斜，搞到本地產業結構單調，人人唔係炒股，就係炒樓，經濟獨沽一味，塘水滾塘魚，唔悲觀至奇啦。高官成日話，將經濟個餅做大做厚，其實將個餅分晒畀一小撮人，中產及下一代點會有啖好食呢？

前車可鑑，今屆政府真係要痛改前非吖。香港回歸十六年，結果唔係明天會更好，而係明天會更差，家嘈屋閉無寧日，港產官僚小心被要求查找不足吖，叮！