香港特區內有間幼稚園，舉辦復活節美國十天遊學團，每人收費三萬大元，大小同價。三至五歲小人仔想出埠見識，唔該有家長陪同，即係最低消費六皮嘢！

當上述通告一出，全港嘩然（除本地教育局官員外），但該校力撐物有所值，有助學童擴闊眼界咁話添！

本人的記憶力一直欠佳，唔知各位讀者點樣？請問你哋記唔記得三歲時學過乜？見過乜呢？

係！十萬八萬對一啲唔知米貴、不諳民間疾苦的人嚟講，並不算甚麼大錢，但全世界咁多好去處，偏偏選中疑似「反中亂港」的「幕後黑手」，那個美帝外國勢力，大拿拿抬二百幾萬進貢去？好反智白癡啫！

嗱！最好帶香港學童返祖國山區，感受吓學童有書讀得來不易；若覺得行程安排太悲情，可帶佢哋去東莞見識吓強國土豪夜夜笙歌的歡樂享受，咁仲未算充實，就去埋少林寺學童子功同心口碎大石，有一技傍身或將來喺西洋菜街開檔搵食……中國咁多好地方唔去，竟益敵對勢力之美帝？

我最愛國愛港，堅決反對三萬元一位去美國遊學，若兩千蚊就OK！我又去！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps