SUN搞作：少膽虫手記：無得救癡線全霉
「腦腫，繼正義傳媒之後，又有網民聲討《爛果》呀！」肥豪氣急敗壞，拎住份來自熄登嘅膠post衝過嚟講。「挑，你驚啲乜？」見有人阻住自己食千蚊早餐，少膽虫一於愛理不理。「腦腫，啲網民似乎嚟真，佢哋話要從後庭擊潰我哋呀！」對住條唔知咩叫知情識趣嘅肥仔，少膽虫決定使出旋風腿，「我踢！」面前嘅一舊肥肉馬上直線飆向辦公室角落，縮成肉團。
數秒之後，肉團膨脹起來，肥豪掩着佢嘅「後庭」，狀似劇痛，冤屈地問：「腦腫，因為我擔心壹全霉，先學魏徵進諫，點解你仲要咁對我？」少膽虫真係唔明佢有咩好擔心，鄙夷答道：「肥豪，你入咗嚟咁耐，壹全霉幾時驚過網民？我哋喺創作方面有幾時唔係獨領風騷？」肥豪伸出沾着臭汗的手，委曲說道：「今次真係唔簡單……佢哋諗住同正義傳媒夾埋，打持久戰，每個禮拜都熄我哋機一次，話唔再食垃圾喇……」
「哈哈，咁仲簡單啦！」少膽虫輕振雙臂，得戚答道：「我哋以後block晒所有反我哋嘅傳媒，等佢哋變晒全霉！睇吓邊個贏？」語畢，肥豪嚥一嚥口水，語重心長咁講：「唔得！我哋唔夠人手喇，因為出面全部人都係反我哋架……」
