城中鏡：莊偉茵率義工繡上河圖
雖然天水圍曾被人標籤為「悲情城市」，查實當中嘅姊妹，入得廚房出得廳堂，仲繡得一手好工藝，街坊喺舊年發起「千人齊繡清明上河圖」，中華電力企業發展總裁Quince莊偉茵知道之後，二話不說帶五十幾位義工，尋日齊齊入天水圍加入繡花行列。
莊偉茵（前）同義工們齊繡「清明上河圖」，作品完成後，將申請列入健力士紀錄大全。（受訪者提供）
莊偉茵（中）買咗個雙魚掛牆刺繡鐘送畀老公黃楚權（左）。
今次活動由天水圍居民協會發起，雖然班師奶唔係藝術家，但佢哋決心將「上河圖」以刺繡方式重現港人眼前，於是搵來一幅長達二十二米嘅布，一針一針將圖案繡上。經過日以繼夜，夜以繼日趕工，已完成百分之七十嘅「工程」。咁有意義，Quince尋日帶埋班中電義工，由零開始學十字刺繡，先喺普通布料上練習，熟練後埋位幫手繡「上河圖」，功夫有板有眼。Quince承諾話幾忙都好，稍後一定參加「收針儀式」，見證大功告成一刻。不過，想睇佢嘅大作，就要等到明年嘞！繡完一輪，Quince臨走前不忘幫襯街坊，買咗一個掛牆刺繡鐘，仲有一幅刺繡畫。個鐘面上繡有兩條魚，Quince甜絲絲話：「老公係雙魚座，啱晒佢。」
