城中鏡：港大點磚成金 籌獲5200萬
依家各間大學都為咗籌款各出奇謀，好似香港大學咁，今次就發起校友捐錢買磚頭行動，話咁易就令「紅磚」變「金磚」!為籌款擴建百周年校園，港大喺二○○八年開始「磚．故事．牆」行動，校友捐一萬八千蚊，就可以買起校園其中一塊磚頭，任你鍾意寫乜嘢上去都得，捐三萬八千蚊就有大一倍嘅磚任你發揮，結果有一千七百位校友做咗善長仁翁，連同何鴻燊博士校友配對計劃，總共令港大進帳五千二百幾萬元。
幾百位校友尋日專誠返港大搵自己塊磚，場面十分熱鬧。
沈祖堯同太太喺塊磚度寫住「百年基業．春風化雨」，答謝港大嘅教導。
梁智鴻同太太塊磚以「TO OUR TEACHERS」為題，好有意思。
有港大校友以「三嬸」（左）名義捐錢，徐立之亦走上前問「三嬸」嘅近況。
港大校長徐立之尋日主持磚牆揭幕儀式，好多捐咗錢嘅校友都返嚟搵番自己塊磚，好似中大校長、港大醫學院校友沈祖堯咁，佢同太太一齊捐錢，仲喺塊磚度寫住「百年基業．春風化雨」，真係有意思，沈校長夫婦搵到自己塊磚都不知幾開心，仲即刻影相留念。港大校務委員會主席梁智鴻亦同太太一齊捐錢，佢哋用英文喺塊磚度寫上「TO OUR TEACHERS」，表達對老師敬意。
校友以「三嬸」名義捐錢
查實喺現場仲搵到好多著名校友嘅磚頭，包括一九四一年以一級榮譽畢業嘅鍾士元爵士、賭王何鴻燊、前校長黃麗松同鄭耀宗等，有港大校友仲以服務港大宿舍幾十年嘅「三嬸」名義捐錢，問番徐立之校長有無份捐錢，佢就話自己唔係校友，今次係校友活動，佢下次就會出錢出力咁話。
睇番啲名人校友嘅磚，上面多數只係寫咗自己嘅名同畢業年份，相反其他校友就情感豐富兼有創意得多，有人示愛、答謝父母、仲有港大家長紀念子女出世添，亦有校友好關注港大發展，之前八一八事件報告建議喺港大樹立一塊寫住「港大永遠是言論及學術自由的堡壘」嘅碑，校方遲遲未做嘢，有校友就喺自己塊磚度寫上呢幾個字。
